ஆசிய கிண்ண கிரிக்கெட் தொடரில் கடந்த ஞாயிற்றுக்கிழமை துபாயில் நடைபெற்ற ஆட்டத்தில் இந்தியா – பாகிஸ்தான் அணிகள் மோதின. இந்த ஆட்டத்தில் டாஸின்போது இந்திய அணியின் தலைவர் சூர்யகுமார் யாதவ், பாகிஸ்தான் அணியின் அணித்தலைவர் சல்மான் அலி ஆகாவுடன் கைகுலுக்கவில்லை.
மேலும் டாஸின்போது இரு அணிகளின் தலைவர்களுமே தங்களின் விளையாடும் லெவன் பட்டியலை பரஸ்பரம் பகிரும் நிலையில், அந்த ஆட்டத்தில் சூர்யகுமார் யாதவும், சல்மான் அலி ஆகா இருவருமே மேட்ச் ரெஃப்ரீயான ஆண்டி பைகிராஃப்டிடமே பட்டியலை பரிமாறிக் கொண்டனர். தொடர்ந்து, ஆட்டத்தின் முடிவிலும் இந்திய வீரர்கள், பாகிஸ்தான் வீரர்களுடன் கைகுலுக்கவில்லை.
இந்த விவகாரம் சர்ச்சையாகி இருக்கும் நிலையில், இதற்கு பொறுப்பாக ஆட்ட நடுவர் ஆண்டி பைகிராஃப்டை நீக்க வேண்டும் என பாகிஸ்தான் கிரிக்கெட் வாரியம், ஆசிய கிரிக்கெட் கவுன்சிலிடம் புகார் அளித்தது. மேலும் இந்த விவகாரத்தை ஐசிசியிடமும் முறையிட்டது. இந்நிலையில் பாகிஸ்தான் கிரிக்கெட் வாரியத்தின் கோரிக்கையை ஐசிசி நிராகரித்துள்ளது.
ஆண்டி பைஃகிராப்ட் நீக்கப்பட மாட்டார் எனவும், உங்களது மனு நிராகரிக்கப்படுகிறது எனவும் ஐசிசி-யிடம் இருந்து பாகிஸ்தான் கிரிக்கெட் வாரியத்துக்கு பதில் அனுப்பப்பட்டுள்ளதாக தகவல்கள் வெளியாகி உள்ளது.
69 வயதான ஜிம்பாப்வேயை சேர்ந்த ஆண்டி பைஃகிராப்ட் ஆசிய கோப்பை தொடரில் இன்று பாகிஸ்தான் – ஐக்கிய அரபு அமீரகம் அணிகள் மோதும் கடைசி லீக் ஆட்டத்தில் மேட்ச் ரெஃப்ரீயாக செயல்பட உள்ளார். ஐசிசி எலைட் பேனலின் போட்டி நடுவர்களில் சீனியரான பைக்ராஃப்ட், 695 சர்வதேச ஆட்டங்களில் பணியாற்றி உள்ளார்.